戒掉一注獨贏霸氣

好多上咗岸嘅前輩成日講，要係股市入面賺錢，最後都係講求心理質素。

是咁的，每天股價都係到跳上跳落，要相信自己觀點之餘，又要質疑自己觀點，自信心小一點，都好容易斬完又追，追完又斬，就算睇中方向都要蝕錢。

蝕一元 = 賺兩元？
有心理學家指，蝕一元帶比人的痛苦，要賺兩元先足夠抵償到。若想一想平日買股的行為，買升當然係相信未來股價會升，或者股息回報非常吸引，總之就係買元後，身家會變多。不過，如果市場倒轉黎行，身家反而縮水，痛苦感當然厲害。

更令人難受的係，先賺後蝕。例如用10萬元買入一隻股票後，升到上20萬，回報1倍，個人當然會有飄飄然嘅感覺。不過突如其來嘅壞消息，三兩下將隻股價推低，剩返7萬，感覺就會更加生不如死。

計一計條數，10萬蝕到落7萬，都係3萬銀，當然都係叫傷，但係心理上只係承受 咗3萬銀嘅痛苦感。不過如果從20萬跌落黎，一來一回身家差13萬，承受嘅痛苦感立即幾何級數倍升，有時更會直接進入麻木狀態，信心盡失，連斬倉都冇力去 做，令損失繼續擴大，這亦是股市最恐怖之處。

股票: 進可攻，冇得守
買紅酒酒花，進可攻，退可飲。買樓放租，進可攻，退 可住。皆因以上兩者都係實物，本身價值易於衝量。但係，股票則為虛無縹緲的權益，如果權益消散，股票只係一張「劃花」咗嘅紙，完全冇用，貼牆都想搵張好 啲。所以進可攻，冇得守，令人好多時面對市場恐懼，會選擇沽咗先，然後講句早抖。

作為一個小投資者，應付恐懼最有效的方法之一，係控制投入金額，又稱注碼。早兩年，諗住分散投資，最高注碼限為四分之一，令單一損傷降低，就算遇上逆市，做決定能更加冷靜，但去到上年8月，個市跌落黎，個股一日10幾個百分點咁跌，執行斬倉行動，非常痛苦，亦唔夠狠。

戒掉一注獨贏霸氣
講到爛嘅所羅門智慧，唔會將全部雞蛋放係同一個籃，分7至8份放開，愈來愈覺得這是一個好比例。

雖然一注獨贏又型又酷，但除非天生霸氣十足，局局以必死心態去買，又或練得一副鐵石心腸，否則控制金額及分散投資係累積財富的不二法門。

火兄當年經歷一注獨贏中石油，贏來千萬財富後的大動作就係，係將軍澳買四個單位，以及專心搞自己生意，明顯亦是分散投資之作，可能連佢自己都冇發覺。

金融界傳奇人物，美國大炒家Jesse Livermore睇市極準，經常進行大手買賣，曾於華爾街股災，沽到大銀行家J.P Morgan向佢求饒，但亦屢犯錯誤，一生破產幾次，值得引以為鑑。