怎樣才是好的地產代理？

引用 dozy 文章

怎樣才是好的地產代理？
對大市有獨到見解？...專業投資者贏計數，唔係靠估；
經驗知識豐富？...都好，但自己都要識，唔可以靠人；
熟悉該區行情？...都好，不過自己八到，唔係最重要；

咁咩先係最重要？...肯幫自己，才是最重要！
我的好代理，不代表是你的好代理！
今天在土瓜灣跟一位資深的地產代理 K 睇樓...

代理 K 驗非常豐富...
對區內掌故發展、區內樓市買賣租賃行情，都瞭如指掌，跟他鑽到大街小巷，看名不經傳的單幢樓，又跟他走上唐七樓，看街坊鄰里如何期待重建收購，實在是賞心樂事，學到不少。
不過最後，我還是沒有把他的名片帶回家，丟掉了！

為甚麼？因為他不願意幫我...
他 極力推介上鄉道一個唐七樓單位，實用 550 呎，地方很寬敞，業主開價 $268 萬，據他所說，銀行估價是 $210 萬，市值租金約 7,000 元。代理 K 說：「市區 $200 幾萬邊買到咁大地方？呢度有收購潛力呀，之前傾到呎價 $11,500 業主都唔賣呀！」「咁筍，冇得點傾啦，要買就快啦。」
．銀行估價爭 $50 多萬，叫高 28%，咁都話筍？！
．就當唐樓估唔足，租金回報 3.13%，點筍？點守？
．收購價 $11,500？灣仔、西環都係咁上下，講堅？
．如果唔收呢？土瓜灣唐樓一望無際，貼唔中點先？

後來我請他幫我紅磡個盤，更肯定他不願意幫我！
我的單位，距將來何文田站幾分鐘步程，地段、景觀、樓齡、樓層都高出兩班，還有超靚裝修。由於成交不多，估價約 $230 萬，$255 萬都會考慮收票，誰知代理 K 竟然跟我說：「鍾生...你層樓邊值到呢個價，$210 萬左右幫你出啦。」
．全幢大廈投資兵團有七、八個盤，真係當我唔知價！
．試都唔願試，睇都未睇就一刀殺埋嚟，裝修唔使錢呀？
．我賣就要低估價一成，買就要高估價三成，仲成世界？

如果代理唔幫你，經驗越好，知識越高，你越死得快！
就好似代理 K，好明顯他有一班熟客、投資者，當我搵佢放盤...佢就幫佢班投資者殺價入平貨，當我搵佢搵盤，佢就幫佢班客托高個價出貨...新手邊夠佢玩？冇怪佢...搵食啫！

每個代理都有自己熟客，唔幫熟客唔通幫我咩？
同樣，每個投資者都要有肯幫自己的代理！
我的好代理，不代表是你的好代理！
你的好代理，可能是我的災星！買賣就是在角力...

睇完樓，散水，就把名片丟掉~~
打電話給自己的相熟代理，大步走過去...